Valerie Wood - Sas chú Dlíe (Медведь и белка. Сказка чипевьян) | Текст песни

• Тексты песен
• Valerie Wood
• Sas chú Dlíe (Медведь и белка. Сказка чипевьян)

Sas chú Dlíe

Iłá Sas adi ú “Tetłeghe hóyį́ howa’ą́ Tedhe dínedhile síne ú honelyą nakodes’įhile Eyit’á tetłeghe hóyį́ newalé” héni. Ekú bechele Dlié ayéłni “Tetłeghe hóyį́ nįdé edlawųneú nakoditł’i wali t’asi wų'įhile” yełni. Sas adi ú “Si bįkadestsą́n dé benaxós’a walí.” héni. Dlié ayełni “Nįnie egé hóyį́ losą” héni.

Sas adi ú “Ekú dé bįka desnik dé” hęni. “Nįlá tth’í hegor losą́” yéłni. “Ekudé bįkásxeth losą́.” héni Sas. Dlié adi ú “łeghądinįldher losą́ nįzí ghągé dé.” yéłni. “Ekúdé dzįthe kúlú walé”. Ekúdé ełch’a hokahowúldher.” héni Sas.

Ekú dé ełedewúldzá héni sas. “Edlaghį ho’ąniłtha naghelgos ni walí” héni. Sas beghąhonélną. Tth’i edlaghį ho’ą́zoį dahoní la walí” hení. Sas tth’i beghąhonélną. Ekú tth’i at’axą. “Edlaghį ddhiri tuaza k’é the tadanalgé la walí” héni. Ekú Sas nechá t’á Dlie nechile t’dá yetthe tadanałgé nadlį.

Ekú eyi t’á Sas horelyų́ t’á beghą honéłną. Sas wats’i kúlú ba t’asǫt’ehilé. “Tahį honéłną walé si eyi Sas walé” hení t’ani.

Ekú Dlié thų́ Sas wasłé hení ú hetsak ú. Ets’įnathé thú adi hóyį́. Benaghé hádáthetsé. Eyi t’a benaghé horelk’oz. At’ axą Dlíe adi “Tasi ka set’orudhihíle hik’e t’á si sekwi seghą nadloduldé hóyį́ walé” héni. El’aze k’e dałgé. Eyer hots’į́ ts’ ugade héjá.

Ekú Sas tth’i adi “Si ber hule ú hoba etthén wasłé” héni ú yenedaghe nih honizį́ ts’én tełgé. Eyi tth’i nechá héjá eyer hots’į.