Алибек Тамбиев - "Ля иляха илля Ллах" демекни магъанасы (зикир) | Текст песни и Перевод на русский

• Тексты песен
• Алибек Тамбиев
• "Ля иляха илля Ллах" демекни магъанасы (зикир)

Pesni.guru - сайт для Гуру

Нашид на стихи Абу-Юсуфа Эбзеева.

\"Ля иляха илля Ллах\" демекни магъанасы,
Не болгъанын айтайым – муслиманны къаласы.

Къуллукъ этерге тыйншлы, биз бойсунуб Кесине,
Джангыз Аллах болмаса, адам алыб эсине,

Андан башха джокъ илях, биз унутмайыкъ аны,
Ол болгъанын иляхы бютеу махлукъатланы.

Джокъдан бар этген Аллах - хар нени да Иеси,
Джаратхан затларына оноучу – къуру Кеси.

Мени да Ол джаратды, оноучум Олду мени,
Адам оноу джарамаз - Олду оноучунг сени.

Ол оноугъа тынгылаб, Ол айтханча турмакълыкъ,
Буйругъуна сыйыныб, аллай джашау къурмакълыкъ,

Ол айтхандан чыкъмайын, джашауун алай этсе,
Аллахны джолун тутуб, дуниядан алай кетсе,

\"Ля иляха илля Ллах\" деб, алай айтса бир киши,
Аллах буюргъан кибик болсун аны хар иши.

\"Ля иляха илля Ллах\" деб, бегиталса биреу,
Аллах айтхан затланы этсин кесине тиреу.

\"Ля иляха илля Ллах\" деб айтхан адам толу,
Ол буюргъанча турса, олду Аллахны къулу.

Аны айтхан хар адам, ол къул болуб бармайды,
Буйругъунда турмаса, сёзден файда алмайды.

\"Ля иляха илля Ллах\" деб, чайкъалмаса анга,
Къуру ол саналады Аллахха ийнаннганнга.

\"Ля иляха илля Ллах\" деб, джолунда джюрюмей,
Башха джолну джюрюсе, къалмаз андан юзюлмей.

\"Ля иляха илля Ллах\" деген сёзню ким айтса,
Бегиб къатдырсын кесин, муъмин тюлдю къайытса.

\"Ля иляха илля Ллах\" адамлыгъын бегитсин,
Бу дунияны юсюнден андан таймайын кетсин.

\"Ля иляха илля Ллах\" адамланы сюзеди,
Адам орнун тутмаса, андан чёбню юзеди.

\"Ля иляха илля Ллах\" дараджаны ёсдюред,
Хайуан кибик ёлмейин, адамча ол ёлтюред.

\"Ля иляха илля Ллах\" адамлыкъны толтурад.
Къуру кесин тындыргъан хайуан была тенг болад.

\"Ля иляха илля Ллах\" адамланы тюзетед,
Аны сыйлагъанланы керти джолда тюз элтед.

\"Ля иляха илля Ллах\" адамланы сакълайды,
Шайтан джолгъа иймейин, сыйсыз этмей джакълайды.

\"Ля иляха илля Ллах\"-ды насыбы бютеу халкъны,
Андан кери англамаз ётюрюкню эм хакъны.

\"Ля иляха илля Ллах\" – муслиманны байлыгъы,
Дунияда, ахратда да малы, мюлкю, джайлыгъы.

\"Ля иляха илля Ллах\" – эки дуния къаласы,
Андан кери къачмасын муслиманны баласы!

\"Ля иляха илля Ллах\" – джаннетлени багъасы,
Ансыз мында джашауну джокъду бир магъанасы.

\"Ля иляха илля Ллах\" – муслиманны къууанчы,
Джашауну англагъаннга – олду къуру джубанчы.

\"Ля иляха илля Ллах\" – джаннетлени ачхычы,
Муслиманны мийикге чыгъарыучу басхычы.

\"Ля иляха илля Ллах\" – адамлагъа кёл берген,
Анга бегигенлени бетлерине нюр келген.

\"Ля иляха илля Ллах\" – этмеген уллу кёллю,
Халкъны джолгъа тюзетген, болуб кетмейин бёрю.

\"Ля иляха илля Ллах\" – муслиманны къарыуу,
Андан таймай ким ёлсе, джаннетгеди барыуу.

\"Ля иляха илля Ллах\" – джаннетлеге кийирлик,
Аны англагъан киши этер халкъгъа игилик.

\"Ля иляха илля Ллах\" деб, аууз айтхан джарамаз,
Ол джюрекден чыкъмаса, Аллах анга къарамаз.

\"Ля иляха илля Ллах\" – турсун сени эсингде,
Хар адам да сакъласын ол сёзню биргесинде.

\"Ля иляха илля Аллах\" болуб аманнга буруу,
Игиликле этерге хаман кюрешиб туруу.

\"Ля иляха илля Ллах\" аны амандан тыйыб,
Аллах буюргъан джолгъа ол аны болсун джыйыб.

\"Ля иляха илля Ллах\" болсун аны джашауу,
Кёб айтсын аны хаман, болмай башха джаншауу.

\"Ля иляха илля Ллах\" демесе, джашау тюлдю,
Ансыз джашагъан киши, сау болса да, ёлюдю.

\"Ля иляха илля Ллах\" демеген нек джашайды?
Ол ашагъан ашын да зырафына ашайды.

\"Ля иляха илля Ллах\" - адамгъа бек керекди!
Малы, мюлкю дунияны ол ёлсе не берликди?!