Алибек Тамбиев - «Ля иляха илля Лллах» демекни магъанасы (нашид) | Текст песни и Перевод на русский

• Тексты песен
• Алибек Тамбиев
• «Ля иляха илля Лллах» демекни магъанасы (нашид)

Pesni.guru - сайт для Гуру

Мелодия народная, стихи Абу-Юсуфа-хаджи Эбзеева.

"Ля иляха илля Лллах" демекни магъанасы,
Не болгъанын айтайым – муслиманны къаласы.

Къуллукъ этерге тыйншлы, биз бойсунуб Кесине,
Джангыз Аллах болмаса, адам алыб эсине,

Андан башха джокъ аллах, биз унутмайыкъ аны,
Ол болгъанын Аллахы бютеу махлукъатланы.

Джокъдан бар этген Аллах - хар нени да Иеси,
Джаратхан затларына оноучу – къуру Кеси.

Мени да Ол джаратды, оноучум Олду мени,
Адам оноу джарамаз, Олду оноучунг сени.

Ол оноугъа тынгылаб, Ол айтханча турмакълыкъ,
Буйругъуна сыйыныб, аллай джашау къурмакълыкъ,

Ол айтхандан чыкъмайын, джашауун алай этсе,
Аллахны джолун тутуб, дуниядан алай кетсе.

"Ля иляха илля Аллах" деб, алай айтса бир киши,
Аллах буюргъан кибик болсун аны хар иши.

"Ля иляха илля Аллах" деб, бегиталса биреу,
Аллах айтхан затланы этсин кесине тиреу.

"Ля иляха илля Аллах"" деб айтхан адам толу,
Ол буюргъанча турса  олду Аллахны къулу.

Аны айтхан хар адам  ол къул болуб бармайды,
Буйругъунда турмаса, сёзден файда алмайды.

"Ля иляха илля Аллах" деб, чайкъалмаса анга,
Къуру ол саналады Аллахха ийнаннганнга.

"Ля иляха илля Аллах" деб, джолунда джюрюмей,
Башха джолну джюрюсе, къалмаз Андан юзюлмей.

"Ля иляха илля Аллах" деген сёзню ким айтса,
Бегиб къатдырсын кесин, муъмин тюлдю къайытса.

"Ля иляха илля Аллах" адамлыгъын бегитсин,
Бу дунияны юсюнден андан таймайын кетсин.

"Ля иляха илля Аллах" адамланы сюзеди,
Адам орнун тутмаса, андан чёбню юзеди.

"Ля иляха илля Аллах" дараджаны ёсдюред,
Хайуан кибик ёлмейин, адамча ол ёлтюред.

"Ля иляха илля Аллах" адамлыкъны толтурад.
Къуру кесин тындыргъан хайуан была тенг болад.

"Ля иляха илля Аллах" адамланы тюзетед,
Аны сыйлагъанланы керти джолда тюз элтед.

"Ля иляха илля Аллах" адамланы сакълайды,
Шайтан джолгъа иймейин, сыйсыз этмей джакълайды.

"Ля иляха илля Аллах"ды насыбы бютеу халкъны,
Андан кери англамаз ётюрюкню эм хакъны.

"Ля иляха илля Аллах" – муслиманны байлыгъы,
Дунияда, ахратда да малы, мюлкю, джайлыгъы.

"Ля иляха илля Аллах" – эки дуния къаласы,
Андан кери къачмасын муслиманны баласы!

"Ля иляха илля Аллах" – джаннетлени багъасы,
Ансыз мында джашауну джокъду бир магъанасы.

"Ля иляха илля Аллах" – муслиманны къууанчы,
Джашауну англагъаннга – олду къуру джубанчы.

"Ля иляха илля Аллах" – джаннетлени ачхычы,
Муслиманны мийикге чыгъарыучу басхычы.

"Ля иляха илля Аллах" – адамлагъа кёл берген,
Анга бегигенлени бетлерине нюр келген.

"Ля иляха илля Аллах" – этмеген уллукёллю,
Халкъны джолгъа тюзетген, болуб кетмейин бёрю.

"Ля иляха илля Аллах" – муслиманны къарыуу,
Андан таймай ким ёлсе, джаннетгеди барыуу.

"Ля иляха илля Аллах" – джаннетлеге кийирлик,
Аны англагъан киши этер халкъгъа игилик.

"Ля иляха илля Аллах" деб, аууз айтхан джарамаз,
Ол джюрекден чыкъмаса, Аллах анга къарамаз.

"Ля иляха илля Аллах" – турсун сени эсингде,
Хар адам да сакъласын ол сёзню биргесинде.

"Ля иляха илля Аллах" болуб аманнга буруу,
Игиликле этерге хаман кюрешиб туруу.

"Ля иляха илля Аллах" аны амандан тыйыб,
Аллах буюргъан джолгъа ол аны болсун джыйыб.

"Ля иляха илля Аллах" болсун аны джашауу,
Кёб айтсын аны хаман, болмай башха джаншауу.

"Ля иляха илля Аллах" демесе, джашау тюлдю,
Ансыз джашагъан киши, сау болса да, ёлюдю.

"Ля иляха илля Аллах" демеген нек джашайды?
Ол ашагъан ашын да зырафына ашайды.

"Ля иляха илля Аллах" - адамгъа бек керекди!
Малы, мюлкю дунияны ол ёлсе не берликди?!

"Ля иляха илля Аллах"